3 xullo

Obradoiro de improvisación con Saúl Puga
Estudo H.A.L.O: Obradoiro de Improvisación Libre

11:00h, MARCO
2 horas
Non hai limite de idade.
12 prazas

O taller vai destinado a todo aquel que toque un instrumento, e teña certa soltura e dominio del. Non hai limite de idade, nin fai falta titulación.

A improvisación libre, sen restricións de ningún tipo, é unha importante e liberadora forma de música, unha actividade altamente creativa que non pode ser substituída por ningunha outra, e non debe confundirse con estilos nin compositores específicos. O traballo deste taller varía entre o improvisar totalmente libre, sen consignas que seguir, ate pezas compostas para ser interpretadas por improvisadores nas cales, aínda que a marxe de liberdade sexa considerable, o músico está obrigado a seguir instrucións concretas do compositor.

Neste taller introdutorio crearemos entre dúas e tres pezas, das que logo se fará unha mostra a modo de micro concerto. Traballaremos materiais específicos, estruturas, falaremos da importancia do silencio, do non tocar e da escoita activa.

4 xullo

Obradoiro con Mónica de Nut
Desconcerto de gritos para coro e solistas en sol maior

11:00h, MARCO
3 horas
A partir de 6 anos
30 prazas

Neste taller a Academia de Sons céntrase nun gran instrumento de vento que todos usamos a diario, a Voz. Mónica de Nut convídanos a participar neste taller lúdico, liberador e totalmente práctico dirixido todos os públicos, no que se traballará co GRITO, o son primixenio e auténtico e transgresor por contraposición ao límites, normas e formas. 

Despois dun adestramento vocal básico, traballarase coas voces en bruto de todas as idades pero organizadas delicadamente segundo os canons da música académica occidental, tres movementos (AllegroAdagio un poco mossoAllegro ma non troppo) cunha obertura fugada de SILENCIO e momentos de cadencia para a improvisación e lucimento da técnica do griterío.

O taller rematará cunha performance na escaleira do MARCO na que os participantes ofreceran un DESCONCERTO DE GRITOS guiado por Mónica de nut.

5 xullo

Obradoiro con Julián Elvira
Tubocatessen

11:00h, MARCO
2 horas
Todos os públicos a partir de 7 anos
25 prazas

Julián Elvira presenta a frauta Prónomo nesta edición do festival.

Julián Elvira proponnos un taller pensado para todos os públicos e moi especialmente para nenos e nenas, que mestura improvisación con tubos cotiáns e instrumentos tradicionais. Tubocatessen aposta pola imaxinación constante nun mundo que non sempre nos sorrí á primeira, quedando patentes valores como a creatividade e o optimismo cunha estética moderna, un resultado musical plural e unha mensaxe de fantasía.

6 xullo

Obradoiro con Roi Fernández (SrPause)
Cine en directo

11:00h, MARCO
2 horas
A partir de 11 anos.
12 prazas

Na Academia de Sons seguimos a traballar coa mestura das creacións musicais e visuais. Neste taller, SrPause, mostraranos como construír a partir de materiais cotiás (cartón, acetatos, bolsas de plástico, marcadores, etc) e de caixas de luz e webcams, unha sesión de Cine en Directo para videoproxectar interaccionando coa música.

Coas ferramentas aprendidas, os participantes desenvolverán as súas ideas "videoproxectables" de xeito colectivo nunha mini-sesión final de Cinema en Directo.

YEP!
En concerto

13:30h, Exterior do MARCO
hora e media

15 prazas

Un grupo de estudantes do Conservatorio Superior de Música de Vigo e amantes de jazz ao vivo na rúa.

O jazz máis noviño de Vigo en directo no exterior do MARCO xunto a un contrabaixista veterano da escena jazzeira galega. Pedro Villanueva, clarinete, Sergio de Miguel, piano, Raúl Cameselle, batería, e Antonio L. Castillo, contrabaixo.

7 xullo

Obradoiro con Olga Cameselle
Jazzmove

11:00h, MARCO
2 horas
De 6 a 14 anos
15 prazas

Da man de Olga Cameselle os participantes tomarán contacto coa música jazz a través do xogo. do movemento corporal e ata atopar o seu xeito de moverse-bailar improvisando co son.

Esta viaxe expresiva farana tanto en grupo como individualmente compartindo as frases de movemento que atopen e formateándoas a xeito de dúos, tríos ou cuartetos. Será un percorrido lúdico pola música co soporte físico da danza.